上兩個星期就同大家介紹過感染到登革熱會點，同埋佢哋傳播威力有幾大，而啱啱喺六月中，短短6日期間就錄得3宗登革熱感染個案，大家都要開始小心提防蚊患季節。但其實蚊傳播嘅疾病點止得登革熱，所以就算蚊仔細細，都唔可以睇小佢㗎！
蚊媒疾病即係以蚊為媒介傳播嘅疾病，本身唔太會喺人與人之間傳播，但只要畀帶有病毒或者寄生蟲嘅蚊針到，就可能會將疾病傳俾下一人，所以即使香港較少出現蚊媒疾病嘅本土感染，一旦有傳入個案亦唔可以掉以輕心。
常見嘅蚊媒疾病包括登革熱之外，仲有瘧疾、黃熱病、寨卡病毒，同基孔肯雅熱等等。佢哋病徵都好相似，通常都有發燒、頭痛、肌肉關節痛、嘔吐等等，聽落好似好輕微，但嚴重嘅可以致命，而好似懷孕婦女感染咗寨卡病毒仲可能令 BB 都會患上小頭症等嚴重疾病添。
以瘧疾為例，估計每年造成全球近 2.5 億人感染，約 60 萬人死亡，當中仲有八 成係 5 歲以下嘅小朋友。死亡人數咁高除咗因為蚊媒疾病嘅病徵太類同、太似普通感冒，喺落後地區容易誤診之外，更重要嘅係延誤治療嘅話，瘧疾可以喺 24 小時內致死，而超過 95% 瘧疾死亡個案都係來自非洲。
無國界醫生喺非洲多國包括馬達加斯加、南蘇丹、尼日爾等地都有展開工作，喺當地嘅醫療中心提供瘧疾嘅醫療護理，希望及早診斷而令病人及時獲得適切治療。
唔知大家記唔記得兩年前，曾經發生過瘧疾傳入香港呢？當時正值瘧疾全球爆發高峰，有近 2.5 億宗感染個案，而單喺 7 月至 8 月頭香港就已經有 75 宗瘧疾輸入個案，感染者全部由非洲來港。好彩因為會傳播瘧疾嘅按蚊好少喺市區出現，加上香港有足夠藥物應付，所以瘧疾出現本地傳播嘅風險其實唔高。不過大家外遊時最好喺出發前睇醫生攞定針對性嘅平安藥，返嚟之後 14 日內最好都係繼續用驅蚊劑避免俾蚊咬到，咁先可以有效預防瘧疾。
即使近年全球疫苗接種率有一定進展，但世上仍有近2,000萬名未接種或未完成疫苗接種嘅兒童，佢哋普遍生活喺脆弱環境或人道危機中，最易受疾病爆發影響。再加上，目前唔係每一種蚊媒疾病都有疫苗，有啲新研發嘅疫苗又因為價格昂貴或未普及，唔係人人都受惠，所以全球都有好多研究人員搵緊更多病媒控制嘅方法，或者更有效診療蚊媒疾病，例如美國有公司從基因改造入手去控制蚊患，希望減少對人類嘅影響。無國界醫生都會繼續推動疫苗同治療嘅研發，並爭取降低呢啲醫療工具嘅價格，救援人員亦會持續將護理帶到世界唔同角落，為有需要嘅人做篩查、疫苗接種同治療，減低傳染病嘅威脅。
#登革熱 #蚊媒疾病 #瘧疾 #蚊患 #MSF101 #疫苗 #疫苗接種
