歐國盃，溫布頓、仲有嚟緊嘅奧運......近排體育盛事浪接浪，捱夜睇都好正常，但大家都小心啲唔好搞到「爆肝」喎！講到肝，其實唔止夜瞓傷肝，如果感染肝炎就更加大件事！
香港就以病毒性肝炎比較常見，即係大家經常聽到嘅甲、乙、丙、戊型肝炎，當然仲有其他因為飲酒、藥物，或者係遺傳病等等而引起嘅肝炎。病毒引起嘅急性肝炎症狀類似，包括發燒、攰、食慾不振、嘔吐、肚痛等等，惡化時皮膚同眼白會變黃，小便亦會變深色，不過亦有病人會冇病徵 。
但係點解分成 咁多種肝炎呢？因為佢哋本身係唔同嘅病毒，傳播方式同殺傷力都唔一樣，甲型同戊型肝炎係經糞口途徑傳播，即係進食或飲用受污染嘅食物或水，而乙、丙、丁型肝炎就係經血液或者體液傳播。今次 #MSF101 就率先同大家介紹下甲型同戊型肝炎！
甲型肝炎其實好早之前就被發現，比較準確嘅記載大概可以追溯至 17 世紀，但去到大概上世紀 40 年代先開始喺流行病學上被區分出嚟，正式測試並辨識到呢種病毒已經係 70 年代嘅事。至於戊型肝炎，則去到 1978 年印度喀什米爾嘅一次大爆發先至正式被發現。據世衛估計，每年甲型肝炎感染個案有 150 萬宗、戊型肝炎感染個案有 2000 萬宗，而佢哋嘅死亡率大概係 1% 或以下。好似喺香港呢啲衞生同水利設施較完善嘅地區，甲型同戊型肝炎唔太普遍，兩種肝炎嘅個案每年都少過 100 宗。
不過喺衞生環境惡劣嘅地區仍然好常見，譬如非洲嘅坦桑尼亞、剛果民主共和國、南蘇丹，以及中亞地區同南美洲部分國家就有唔少甲型肝炎感染個案，而戊型肝炎高度流行嘅地區亦相當廣泛，東亞同南亞尤其常見，而非洲嘅摩洛哥、肯尼亞、尼日利亞等都經常出現戊肝感染個案。
好似喺戰事已經維持超過 9 個月嘅加沙地區，由於當地醫療系統幾乎崩潰，加上缺乏乾淨食水，當地出現唔少懷疑甲肝個案。據世衛數字，喺 2023 年 10 月中至 2024 年 2 月中已經有 8,829 人出現嚴重黃疸問題，推測甲肝已經喺當地爆發 ，但由於醫療資源有限，只確認到一小批甲型肝炎感染個案。 世界各地嘅難民營亦係爆發戊型肝炎嘅溫床，因為普遍環境較擠迫同埋水利衞生設施不足，亦缺乏乾淨食水，好似今年喺非洲國家乍得東部住咗 55 萬蘇丹難民嘅營地，亦出現咗戊肝爆發。
目前冇針對嘅甲、戊型肝炎嘅治療，所以預防係最有效嘅控制方法，好彩兩種肝炎都有疫苗。戊型肝炎疫苗暫時只有一款，而無國界醫生為咗應對南蘇丹戊型肝炎爆發，喺 2022 年同南蘇丹衞生部合作，喺聯合州本提烏嘅國內流離失所者營地首次開展咗三輪戊型肝炎接種運動，為 3 萬居民成功接種疫苗。
除咗疫苗之外，最簡單預防方法就係保持衞生同埋乾淨嘅飲用水。喺加沙，無國界醫生於2023年12月開展用水分發計劃，用水車每日運送 11 萬公升乾淨食水去到當地，希望緩解居民燃眉之急，幫助佢哋預防甲型肝炎同其他與食水衞生相關嘅疾病。而喺乍得我哋今年曾向4個位於東部嘅難民營提供 7 成食水，亦加緊推行健康教育，尤其向當地嘅孕婦同新手媽媽傳授避免染病嘅知識，希望防患於未然。
雖然甲肝同戊肝喺香港唔盛行，但我哋都唔可以掉以輕心，到訪高風險地區前記得要打疫苗！下一次我哋再同大家介紹埋另外 3 種病毒性肝炎，記住留意住我哋啦！
#MSF101 #肝炎 #甲型肝炎 #戊型肝炎
