早排以九龍寨城為主題電影大熱，令已清拆嘅城寨活現眼前──環境逼逼夾夾堆滿人、衞生惡劣、冇位住就不斷臨時搭建⋯⋯咁嘅情境，既係城寨，其實亦都係好多難民營嘅寫照。
根據聯合國難民署 (UNHCR) 嘅數字，截至今年 5 月,以人口計全球 3 大難民營分別係：
孟加拉庫圖巴朗 (Kutupalong) ：約 945,000人
肯亞達達阿布 (Dadaab)：382,658 人
肯尼亞卡庫馬 (Kakuma)：288,206 人
第三名嘅卡庫馬難民營設立於 1992 年，裏面 6 成都係南蘇丹人，而且好多都係因內戰逃走去肯尼亞嘅孤兒。而第二名嘅達達阿布難民營就喺 1991 年設立，同樣收留逃離內戰嘅難民，只係呢度嘅難民幾乎全部嚟自索馬里，高峰期 46 萬名難民就塞晒喺半徑 8 公里圈圈裏面嘅 3 個營地，而且位於沙漠之中，高溫起上嚟成 50 度咁熱！
本來達達阿布難民營係世界最大難民營，但佢嘅世一位置喺 2017 年就俾孟加拉嘅庫圖巴朗難民營取代。2017 年，喺緬甸若開邦 (Rakhine) 嘅衝突逼使數十萬羅興亞人逃亡到孟加拉，現時有90 幾萬人逼喺大約只有 13 平方公里嘅營地裏面，即係大概 1/4 個九龍，而且佢哋嘅住處都只係以竹枝搭建嘅臨時建築 。
庫圖巴朗營所處嘅科克斯巴札爾 (Cox’s Bazar) 原本係一個 5 成都係林木嘅地方，為咗安置突然湧入嘅大量人口，孟加拉移除咗 24 平方公里嘅樹林，冇咗樹木保護唔只令氣溫更加熱，當地平均地表溫度由 2015 年嘅 22.43℃ 升到 2021 年嘅 30.22℃，亦令當地受天災侵襲時更加脆弱，尤其氣候變化令原本只係 6 至 9 月嘅季候風季節加長，而家就算到 10 月都會落大雨。山泥傾瀉、水浸已成家常便飯，積水更滋生蚊蟲，加上衞生環境極為惡劣，所以引發好多疾病，包括傳染病、呼吸道、腸道和皮膚感染，好似喺 2022 同 2023 兩年都爆發登革熱疫情，另外亦曾大型爆發過霍亂、疥瘡等。
住喺營內嘅羅興亞人除咗面對天災、疫病、同埋惡劣嘅生活環境外，佢哋仲因為冇公民身份而唔可以工作同接受教育，只可以靠人道援助維持生活，但國際社會提供到嘅援助越嚟越少，難民每餐飯嘅資助大概只有港幣 $0.7 咁多，所以連基本嘅溫飽都係遙不可及。
唔少羅興亞年輕人被迫挺而走險，加入幫派運毒、偷渡，希望至少有飯食；而羅興亞嘅女仔普遍只可以期望結婚生仔，依賴有能力少少嘅男性唔駛餓死，或者被父母送俾做人口販賣嘅不法份子，希望送佢出去唔駛捱餓。
身心都面對極大挑戰嘅羅興亞人，極度需要各類援助。無國界醫生一直為佢哋提供各類支援，除咗住院同門診等醫療護理之外，仲有疫苗接種、健康推廣、供水網絡等，而且亦為營中嘅羅興亞人提供心理健康護理 ，應對佢哋身心需要。組織上年更同羅興亞社區合作，以竹藤製作咗一幅屬於羅興亞人嘅彩色故事圖，希望透過藝術同故事分享，可以撫慰下唔知幾時可以返家鄉嘅羅興亞人受傷嘅心靈，盡力保育佢哋嘅文化同身分認同。
其實孟加拉因為接收大批羅興亞難民而一直承受頗大社會壓力，近年有關遣返佢哋返緬甸嘅討論時有出現，但因為種種因素短期內無法實現。呢班「離不開、留不低」嘅羅興亞難民，面對毫無寸進嘅局面同資助削減，身心健康都面對極大挑戰。無國界醫生呼籲各界保持關注呢個世上最受迫害嘅族群，以及持續投入援助資源。
#難民 #難民營 #孟加拉 #庫圖巴朗 #科克斯巴札爾 #肯亞 #達達阿布 #肯尼亞 #卡庫馬 #去得咁Pin
