夏日熱辣辣，天氣已經令人心浮氣躁，而喺耳邊 wee wan wan 果隻蚊可能仲會令你煩上加煩。有時怕嘅唔只係俾佢咬到周身痕，更重要嘅係驚佢傳播唔同嘅疾病，尤其係登革熱！
登革熱係一種由蚊傳播嘅病毒，香港常見嘅白紋伊蚊都可以係病媒蚊。登革熱潛伏期有 3-14 日，病發後會出現發高燒、頭痛、眼痛、肌肉關節痛、出疹等，一般喺一星期內會自己好返，但重症病人會喺高燒開始退嘅時候陸續出現嚴重肚痛、嘔，甚至出血，嚴重可導致死亡，所以一啲都唔可以睇小。
香港每年都錄得由外地傳入嘅登革熱個案，舊年全年有 62 宗，而喺今年截至 5 月尾有 26 宗。唔好以為香港個案唔多就冇料到，放眼全球嘅話登革熱嘅傳播其實相當可怕。世界衛生組織指全球登革熱個案喺 2019 年有 520 萬宗，舊年仲錄得超過 650 萬宗感染、7300 宗死亡。今年登革熱感染情況持續嚴重，唔少地區更係港人熱門旅遊地點，包括美洲國家、馬來西亞、泰國同越南等，而預計未來幾十年將有多十億人受登革熱感染威脅。
面對千軍萬蚊，要預防登革熱有咁易咩？多年來人類除咗避開被蚊咬之外，近年終於發現有效而可持續對抗登革熱嘅方法啦，不過唔係滅蚊，而係「放蚊」──定期釋放帶有沃爾巴克氏菌 (Wolbachia) 嘅埃及伊蚊。
原理就係當蚊體內有沃爾巴克氏菌， 就會同登革熱、寨卞等病毒 喺蚊入面爭地盤，咁登革熱病毒更難喺蚊內繁殖，傳畀人嘅機會就自然降低！
頭先提過美洲地區嘅登革熱疫情嚴重，而當中洪都拉斯更係成日面對呢個公共衞生危機嘅國家之一。因此無國界醫生喺舊年 8 月聯同世界蚊子計劃（World Mosquito Program )、當地衛生部等喺洪都拉斯首都內嘅50 個社區展開咗放蚊行動，每星期放一次蚊，放足 6 個月，整個項目暫定為期三年，期間仲會對蚊嘅族群進行檢測，以確定帶菌嘅蚊嘅比例。呢種方法對人同環境都安全，目前已經喺 14 個國家使用，保護近 1100 萬人，仲大大減低蚊媒疾病嘅傳播率！
雖然依家有咗呢種放蚊創新方法，但其實登革熱並冇針對性嘅治療，而多年來亦未研發出一種好安全又適合多數人嘅登革熱疫苗，所以無論留港定外遊，最好都係避免俾蚊咬！除咗登革熱之外，仲有啲咩蚊媒疾病需要留意？記得睇埋下星期嘅 #MSF101 啦！
#登革熱 #蚊媒疾病 #白紋伊蚊
